من جيم بجنيه ونص لوصيف أفريقيا

مكتوب من كلامي في البودكاست والفيديوهات:بودكاست ما وراء البار،قناتي على يوتيوب،إنستجرام

أنا محمد علي الضاوي، من الورديان في إسكندرية. بتمرن من ٢٠١٣، ٢٠١٤. يعني حوالي ١٣، ١٤ سنة، أكتر من نص عمري. اسمعها مني 02:05

كابتن يونس

كنت بروح الجيم بعد المدرسة، وأنا عندي ١٢، ١٣ سنة. ماكنتش رايح عشان الحديد قد ما كنت رايح أقعد مع كابتن يونس، راجل من ذوي الهمم والناس كلها بتحبه. اسمعها مني 07:37

الاشتراك كان تقريبًا جنيه ونص، وكابتن يونس ماكانش بياخده مننا. وفي يوم قالي: طب ما تخش تجرب الجهاز ده. كان البتر فلاي، وده كان أول تمرين ليا. اسمعها مني 07:48

هو السبب إني دخلت كمال الأجسام. وأنا نفسي الناس اللي بتلعب تبقى صورة كويسة لرياضتها، زي ما هو كان. اسمعها مني 08:00

البلحة اللي بتضايق التيشيرت

ماكنتش أكتر واحد معضّل وسط صحابي، بس كنت أقوى من الناس اللي حواليا. اسمعها مني 14:15

وأول مدرب اشتركت معاه كان دايمًا حواليه لاعيبة باور ليفتنج، وده شدّني ناحية القوة. اسمعها مني 12:51

وكنت وأنا صغير بنام على فيديوهات روني كولمان وبصحى على فيديوهات جاي كاتلر. اسمعها مني 07:49

الكاميرا اللي اتباعت

آخر شغلانة قبل اللعبة كنت مساعد مصور، بنزل أفراح مع مصور. كنت بتسحل في الشغل، مش بنام كويس، ومش باخد احتياجي من البروتين. اسمعها مني 07:57

وبعدين حصلت لي ظروف فبعت الكاميرا اللي معايا. جزء من فلوسها صرفته على اللعبة، واهتميت بيها جامد وتابعت مع مدرب. اسمعها مني 08:04

تيك توك، والناس بتوقفني في الشارع

كابتن محمد شلبي، مدرب كنت مشترك معاه، كان شايف فيا حاجة أنا مش شايفها في نفسي. زقّني أصوّر، فبدأت أنزل فيديوهات على تيك توك من باب إنه ما يزعلش مني. اسمعها مني 09:16

وبعدها الناس بقت تشوف الفيديوهات، وبقت توقفني في الشارع. اسمعها مني 09:48

الكوتش لاحظ إن عندي عضلات كبيرة لحد ما زي لاعيبة كمال الأجسام، وقوة قريبة من لاعيبة الباور ليفت. فالفكرة: أوري القوة دي للناس، وأقول لهم في نفس الوقت يا جماعة ما تقلدوش الأوزان بتاعتي. اسمعها مني 09:33

أقف على رجلي

أول هدف كان ليا من اللعبة إني أقف على رجلي. اسمعها مني 19:24

ومن ٢٠١٩ لحد النهارده، كمال الأجسام هو مصدر دخلي الوحيد. ما بشتغلش أي شغلانة تانية. منه اتجوزت، ونقلت أمي وإخواتي لمكان أحسن بكتير. الحمد لله. اسمعها مني 01:10

موسم ٢٠٢٦

الموسم ده خدت المركز الأول في بطولة Free Fit. يوتيوب

وبعدها المركز الأول في كافوري كلاسيك، فئة الكلاسيك فيزيك. شوفها عندي

وقبل الأفريقية بست أيام كتبت: Two titles secured, but we aren’t done yet. شوفها عندي

وفي البطولة الأفريقية IFBB في إسكندرية، نوفمبر ٢٠٢٦، خدت المركز التاني كلاسيك فيزيك، مع كوتش محمد خيري. شوفها عندي

مش غرضي إني أفليكس عليكم. بس لو إنت لسه في أول السكة: في ناس كتير فاكرة إنها ما يطلعش منها حاجة، وأنا كنت واحد منهم. اسمعها مني 10:13